Suxuurtu waa nicmo weyn oo Allah siiyay Muslimiinta si ay u helaan barako, caafimaad, iyo awood ay ku gutaan soonka. Waa sunnah uu Nabigu ﷺ inagu adkeeyey, wuxuuna ina faray in aynan dayicin suxuurta, xitaa haddii ay tahay dhawr xabbo oo timir ah ama biyo.
📖 Nabigu ﷺ wuxuu yiri:"Suxuurta cuna, maxaa yeelay suxuurta waxaa ku jira barako."🔹 (Sahih Al-Bukhari 1923, Muslim 1095)
📌 Ma Jirtaa Duco Gaar ah oo la Yidhaahdo Suxuurta?
Islaamku ma uusan jideynin duco gaar ah oo la yidhaahdo suxuurta. Waxa kaliya oo sunnada ah in:
✅ Lagu bilaabo magaca Allah (Bismillah) marka la cunayo.
✅ Lagu dhameeyo Alhamdulillah marka la dhammeeyo.
Sida la sameeyo wakhti kasta oo la cunayo cunto.
📖 Waqtiga Suxuurta & Aqbalaadda Ducada
Haddii qofku suxuurta daahiyo ilaa xilliga ugu dambeeya ee habeenka, waxa uu helayaa fursad qaali ah:
📖 Nabigu ﷺ wuxuu yiri:"Rabbigeenna Tabaraka wa Ta’aala wuxuu u soo degaa cirka ugu sokeeya habeen kasta marka ay ka hadhay saddex-meelood meel ee ugu dambeeya, markaasuu yidha isagoo u baaqaya adoomihiisa : Yaa i baryaya si aan u aqbalo ducadiisa? Yaa wax i waydiisanaya si aan siiyo? Yaa dembi dhaaf weydiisanaya si aan uga dhaafo?" 🔹 (Sahih Al-Bukhari 1094, Muslim 758)
➡️ Tani waxay ina tusaysaa in waqtiga suxuurta uu yahay mid ka mid ah waqtiyada ugu wanaagsan uguna qaalisan ee ducada la aqbalo. Markaa waa fursad qofku inuu Allah baryo, dembi dhaaf waydiisto, oo ajar u weydiisto iyo in uu soonka iyo acmaash kale ka aqbalo.
📌 Niyadda Soonka
Niyadda soonku waa arrin qalbiga ah, waxaana habboon in qalbiga laga go’aansado in berri la soomayo.Sheekh Al-Islaam Ibn Taymiyyah wuxuu yiri:
✅ "Qofkii qalbigiisa ka xasuusta inuu sooman yahay berri, wuu niyaystay."
➡️ Ma jiro wax duco ah oo la yidhaahdo si niyadda loo sameeyo, waana mid lagu sameeyo qalbiga.
📌 Faa'iidooyinka Suxuurta
✅ Barako & caafimaad – Soonka waxa uu u fududaadaa qofka suxuurta qaatay.
✅ Waqtiga ducada la aqbalo – Waqti aad u qiimo badan ayaa laga helayaa.
✅ Dhaqanka Sunnaha – Waa cibaado iyo dhaqan uu Nabigu ﷺ inoo jideeyay.
📖 Nabigu ﷺ wuxuu yiri:"Farki u dhexeeya soonka Muslimiinta iyo soonka Yuhuudda iyo Masiixiyiinta waa suxuurta."🔹 (Sahih Muslim 1096)
Gunaanad: Ha Ilaawin Suxuurta!
💡 Suxuurtu waa fursad barako leh, cunto caafimaad leh, iyo waqti duco aqbasho leh. Waa astaan u gaar ah soonka Islaamka, waana in aanan dayicin si aan ugu raaxaysano barakada Ramadan.
Comments